၈၈ မျိုးဆက် ကျောင်းသားခေါင်းဆောင်တွေ မိသားစုနဲ့ တွေ့ခွင့်ရ
RFA 2008-11-02
မအူပင်ထောင်ကို သောကြာနေ့က ပြောင်းရွှေခံခဲ့ရတဲ့ ၈၈ မျိုးဆက် ကျောင်းသား ခေါင်းဆောင်တွေဖြစ်တဲ့ ကိုမင်းကိုနိုင်၊ ကိုကိုကြီး၊ ကိုမင်းဇေယျ၊ ကိုဌေးကြွယ်အပါအဝင် ၉ ဦးကို စနေနေ့က မိသားစုဝင်တွေ သွားရောက် တွေ့ဆုံခွင့် ရခဲ့ပါတယ်။ ထောင်ပြောင်းရွှေ့စဉ်အချိန်က သံခြေချင်းတွေဝတ်ပြီး သွားခဲ့ရတယ်လို့ မအူပင်ထောင်မှာ သွားတွေ့ခဲ့တဲ့ ကိုကိုကြီးရဲ့ ညီဖြစ်သူ ကိုအောင်က ပြောပါတယ်။
ကိုအောင်။ ။ "သူတို့အပြောအရတော့ ထောင်ပြောင်းတယ်ဆိုလို့ရှိရင် ခြေကျင်းနဲ့သွားရတယ်လို့ပြောတယ်၊ အဲဒါက ထောင်အစဉ်အလာလို့တော့ ပြောတာပဲ၊ အခုလည်း ခြေကျင်းနဲ့သွားရတာပေါ့၊ လှမျိုးနောင်က ဖမ်းသွား ကတည်းက ဆေးရုံတက်နေတဲ့အချိန်မှာ ဖမ်းတာဆိုတော့ သူက မျက်လုံးမကောင်းဘူးလေ၊ မျက်လုံးတဖက်က ကွယ်သွားတယ်၊ နောက်တဖက်ကလည်း နောက်ပိုင်းသိပ်မကောင်းဘူး၊ ဒီတိုင်းသာ သွားရင်တော့ သိပ်မကောင်းဘူး။"
သူတို့အားလုံးရဲ့ အမှုတွေကိုလည်း မအူပင်ထောင်က တရားရုံးမှာပဲ ဆက်လက်စစ်ဆေးဖို့ ရှိတယ်လို့သိရပါတယ်။ ကျောင်းသားခေါင်းဆောင် ၉ ဦးကို နောက်ဆုံးအကြိမ် အင်းစိန် အကျဉ်းထောင်ထဲ ထောင်ခြောက်လစီ ချမှတ်တဲ့အချိန်မှာ တရားလိုဘက်က ထွက်ဆိုတဲ့သူ မရှိတဲ့အပြင် နှစ်ဖက်ရှေ့နေတွေလည်း မရှိဘူးလို့ ကိုအောင်ကပြောပါတယ်။
ကိုအောင်။ ။ "သူတို့နောက်ဆုံးကြုံရတဲ့ အဖြစ်ကတော့ တိုင်းတရားသူကြီးဆိုတဲ့ ပုဂ္ဂိုလ်ရောက်လာတယ်၊ ရောက်လာပြီးတော့ အဲဒီအမှုနဲ့စွဲတယ်၊ ၂ဝ၈ နဲ့စွဲတယ်၊ အဲဒီတော့ သူတို့က ဖြစ်ကြောင်းကုန်စင်ပြောတယ်။ တောက်လျှောက်စစ်မယ်ဆိုပြီး ခေါ်သွားတာ ၁၄ လကြာတဲ့ ကိစ္စတွေရော ရုံးတော်မှာ ဖြစ်စဉ်တွေအားလုံးကို ပြောတယ်။ နောက်ဆုံးတော့ ခင်ဗျားတို့ အပြစ်ရှိလား၊ မရှိဘူးလာပြောတယ်၊ မေးတော့ တရားသူပြီးတယောက်ဆိုတာ ဦးနှောက်ရှိတယ်၊ ဆင်ခြင်တုံတရားရှိတယ်၊ အဲတော့ ခင်ဗျားဘာသာ ဆုံးဖြတ်ရမှာဖြစ်တယ်၊ ကျနော်တို့မဖြေနိုင်ဘူးပြောတယ်၊ အဲဒါ ခင်ဗျားတို့ အပြစ်ရှိလား၊ မရှိဘူးလား၊ ၃ ခါ မေးတယ်။ ငြိမ်ပြီးတော့ ဘယ်သူမှမဖြေကြဘူး၊ မဖြေတဲ့အခါကျတော့ တရားသူကြီးက ဆိတ်ဆိတ်နေခြင်းက ဝန်ခံခြင်းပဲလို့ သတ်မှတ်ပြီးတော့ ၆ လ ချပြီးတော့ ဒီဖက်ကို ရောက်လာတာပဲ၊ ထူးခြားတာက အဲဒီမှာ တရားလိုအနေနဲ့စွဲရမယ့် ပုဂ္ဂိုလ်မရှိဘူး၊ နောက်ပြီးတော့ နှစ်ဖက်ရှေ့နေ မရှိဘူးတဲ့။"
အဲဒီ ကျောင်းသားခေါင်းဆောင် ၉ ဦးတို့ အနေနဲ့ သက်ဆိုင်ရာ မိသားစုဝင်တွေနဲ့ နှစ်ပတ်တကြိမ် ထောင်ဝင်စာ တွေ့ခွင့်ရမယ်လို့လည်း သိရပါတယ်။
Subscribe to:
Post Comments (Atom)
No comments:
Post a Comment